في تدوينة للسوردو عبر صفحته على الفايسبوك، قال:
الرجل المناسب في الأماكن المناسبة…
معذب الخونة و أعداء الوطن والوحدة الترابية…
هاذ السيد من نهار أصبح على رأس هاذ الجهاز بدينا كنشوفو بزاف الحوايج وتغيرت أمور كثيرة، رجع الكرامة للمواطن ولرجال لأمن، وبدينا كنشوفو واحد التواصل بين الطرفين ما بحالو مثيل، وكيف كتعرفو فنعمة الأمن نعمة كبيرة ولله الحمد، غير واحد مثلا في الحي ديالكم وفي دربكم كيجي يغوت ويخرب ويهرس ويسب الناس ويتعدى, غير مجرد ما كيحضرو رجال الأمن كيصغار و يقلبها طليب و رغيب…مجرد حضورهم نعمة فما بالك ملي كيقومو بالواجب ديالهم على أحسن ما يرام.
كيعيشو معانا شي نمادج والله الذي لارب سواه لو كون ما كانوش الناس ديال الأمن قايمين بواجبهم كون كلاونا و ما تقدرش، انت لي كا تقرا دابا في هاد البوسط، حتى تخرج من داركم ولا تنقل بحرية و بأمن و أمان…شوفو اش واقع في بزاف ديال البلدان الشقيقة و الصديقة.
زيادة على الأمن ولينا كنحسو بالعدل وسط الأمن…الحمد لله والشكر لله ولينا كنشوفو، من بعد ما تولى حموشي زمام الامور، رجال الأمن لي كيستغلو التوني ويتعداو ويحگرو المواطن كيتعاقبو وكيتحاسبو و منهم لي توقف ولي في السجن و لي تفصل عن العمل (كل واحد كينال الجزاء ديالو)، و في المقابل ملي كيتحگر البوليسي كيرجع ليه حقو و كيتعاقب المذنب كي علا شانو و لا صغار شانو…
اليوم كنعيشو ثورة حقيقية في الأمن ..ماشي عاودو لينا…كنعيشوها و حاسين بيها…كنقولو كلمة حق..كنشوفو حموشي حاضر ناضر في كلشي…حتى في المجال الديبلوماسي..ساد ليهم فمهم..قاهرهم، معدبهم، محنهم…الدق و السكات…النيفو طااااالع بزااااف..داير خدمة 100راجل.. نحن وراء هاذ الرجل من أجل المزيد منا الإصلاح والله يدوم علينا نعمة الأمن والله يحفظ بلادنا والله يوفق الجميع وأي مسؤول كيف ماكان النوع ديالو في هاذ البلاد باغي لخير لهاذ البلاد الله يسهل عليه…
بصراحة ما كرهناش بزااااف من حموشي في بزاااف ديال المؤسسات لي مازال خاصها تفيق و تعيق بلي حان الوقت باش المسؤولين ديالها يتعلمو من هاد الراجل و يديرو بحالو ولا يمشيو بحالهم…
سير على الله
تعليقات الزوار ( 0 )